Rozpósłanske lisćiny

Za čo?

Za wuměnu informacijow wužiwamy wulku ličbu rozpósłanskich lisćinow, mjezynarodne kaž tež němsko- abo druhorěčne. Němskorěčne rozpósłanske lisćiny su dale deleka podate. Lisćina globalnych rozpósłanskich lisćinow namakaće na našej mjezynarodnym websydle. Tam so jendźelsce komunikuje. Lisćina druhorěčnych rozpósłanskich lisćinow su w našim wikiju.

Serbskorěčne (pak hornjoserbske pak delnjoserbske) rozpósłanske lisćiny hišće njejsu. Serbske zhromadźenstwo Libreoffice dźě hišće njeje.

Přizjewić

Zo byšće so pola rozpósłanskeje lisćiny přizjewił, pósćelće mejlku na adresu podatu pod "Přizjewjenje". Njetrjebaće ani temu ani powěsćowy tekst zapodać – njeje wšak žadyn rozdźěl, jeli najebać toho něšto zapodaće. Čakajće na wotmołwu. Zwjetša měła w běhu mało sekundow dóńć, kontrolujće swój póstowy kašćik za nowymi powěsćemi. Mějće so potom po instrukcijach w powěsći.

Wotzjewić

Instrukcije, kak móžeće so zaso wot rozpósłanskeje lisćiny wotzjewić, namakaće we wobkrućenskej mejlce kaž tež w nohowej lince kóždeje powěsće, kotruž wot rozpósłanskeje lisćiny dóstawaće. Za problemy při wotzjewjenju smy nadrobny nawod za wotzjewjenje wot rozpósłanskeje lisćiny k dispoziciji stajili.

Mejlki bjez přizjewjenja pósłać

Móžeće tež mejlku bjez přizjewjenja na rozpósłansku lisćinu pósłać. Dźiwajće wšak na to, zo zwjetša žanu wotmołwu na waše naprašowanje njedóstanjeće, dokelž je z wašnjom, wotmołwy jenož na rozpósłansku lisćinu samu pósłać. Zo byšće přepruwował, hač su wotmołwy na waše naprašowanje, dyrbiće do jedneho z e-mejlowych archiwow (hlejće dale deleka) hladać.

PRIWATNOSĆ

Prošu dźiwajće na to, zo so wobsah powěsćow, kotrež na naše lisćiny sćeleće, inkluziwnje wašu e-mejlowu adresu kaž wšě druhe wosobinske daty wobsahowane w e-mejlce zjawnje archiwuja a hižo njehodźa so zhašeć. Wobkedźbujće to prošu při pisanju swojich mejlkow.

E-mejlowe archiwy

Wšě mejlki na rozpósłanske lisćiny so we wjacorych systemach archiwuja: „Archiw“ a „Mail-Archiv.com“. Za němskorěčne rozpósłanske lisćiny namakaće wotpowědne wotkazy dale deleka pola podatych rozpósłanskich lisćinow. Mail-Archiv.com hodźa so z pomocu hesłow za wěstymi temami abo prašenjemi přepytować.

Němskorěčne rozpósłanske lisćiny

Deleka podate rozpósłanske lisćiny su myslene za němskorěčne zhromadźenstwo. Komunikacija so tam němsce wotměwa.

Dalše pokiwy

ŽANE PŘIWĚŠKI

Přiwěški e-mejlkow k rozpósłanskej lisćinje so k abonentam lisćinje dale njesposrědkuja. Stajće za tutón pad dataju zjawnje w interneće k dispoziciji a podajće wotkaz na dataju w swojej mejlce.

NETIKETA

Komunikacija na rozpósłanskich lisćinach sej wěste wobchadne formy wužaduje, tak mjenowanu netiketu. Na zakładźe falowacych nonwerbalnych signalow měła komunikacija přez mjezsobnu česćownosć a zdwórliwosć charakterizowana być. Wjace wo netikeće namakaće na wšelakich stronach w interneće: Wikipedija, Netplanet, Eschkitai.

Podawanje wersijoweho čisła a dźěłoweho systema

Podajće prošu w swojej e-mejlce při naprašowanjach wo konkretnych funkcijach LibreOffice swój dźěłowy system a wersijowe čisło LibreOffice.

Zjeće mejlkow dóstać

Jeli nochceće kóždu jednotliwu powěsć dóstać, ale jenož jedyn raz wšědnje (při wjele mejlkach tež wjacekróć wšědnje) zjeće, móžeće so z wariantu „digest“ na lisćinach zapisać. Připowěsńće za to „-digest“ k normalnej přizjewjenskej adresy. Za rozpósłansku lisćinu „announce“ to by na př. rěkało, zo dyrbiće mejlku na adresu announce+subscribe-digest@documentfoundation.org pósłać.

Přizjewjenje bjez přijimanja powěsćow

Jeli chceće powěsće na rozpósłanske lisćiny pósłać, bjez toho, zo byšće sam powěsće wot tych dóstał (na př. jeli chceće hdys a hdys připowědźe na lisćiny rozpósłać, bjez toho, zo byšće jim slědował), móžeće so z wariantu „nomail“ na lisćinach zapisać. Připowěsńće za to „-nomail“ k normalnej přizjewjenskej adresy. Za rozpósłansku lisćinu „announce“ to by na př. rěkało, zo dyrbiće mejlku na adresu announce+subscribe-nomail@documentfoundation.org pósłać.